Turmush — Таластагы «Манас Ордо» комплексинде реконструкция иштери улантылып жатат. Бул тууралуу облус жетекчилиги билдирди.
Маалыматка караганда, 12-март күнү Курулуш, архитектура жана турак жай-коммуналдык чарба министрлиги менен биргеликте техникалык кеңешме өттү. Анда курулуш иштеринин жүрүшү, айрым кемчиликтерди жоюу, иштерди ылдамдатуу жана курулуштун сапатын жогорулатуу маселелери талкууланды.
Учурда аба ырайынын жылышына байланыштуу курулуш иштерин 2 нөөмөт менен жүргүзүү пландалууда. Комплекстин айланасын жашылдандыруу, бак-дарактарды отургузуу иштери да башталганы турат.
Азыркы учурда музейдин аянтын кеңейтүү жана имаратты бекемдөө иштери жүрүп жатат. Мурда музейдин аянты 400 чарчы метр болсо, реконструкциядан кийин ал 1200 чарчы метрге чейин кеңейтилет. Жакынкы аралыкта ички жасалгалоо иштери башталат. Музей санарип искусство музейи болуп жаңыланып, жаңы экспонаттар коюлат.
Реконструкциянын максаты — имараттарды жөн гана оңдоп-түзөө эмес, «Манас Ордо» комплексин Борбор Азиядагы уникалдуу маданий жана технологиялык борборго айлантуу.
Долбоордун алкагында 300 адамга ылайыкталган заманбап конгресс-холл, 1000 чарчы метрлик, 2 кабаттуу административдик имарат курулууда. Мурда курулган түлөөкана жана мейманкана объектилери да толук жаңыланууда.
2025-жылдын 13-ноябрында президент Садыр Жапаров Талас облусуна болгон иш сапарынын алкагында «Манас Ордо» Кыргыз улуттук комплексин реконструкциялоого мезгил кутусун салган.
Курулуш иштерин ушул жылдын 31-августуна чейин жыйынтыктоо пландалууда. Себеби Кыргызстандын Эгемендүүлүк күнү быйыл Талас облусунда, анын ичинде «Манас Ордо» улуттук комплексинде белгиленет.